احسن طبخه من احسن طباخه

انا يا رومبا اول وحده هشترك

وجايبه تشكيله يارب تعجبكم

العصير
قمر الدين
المقادير:-

• 1/2 لفة قمر الدين مقطعة قطعاً صغيرة
• 1/2 كوب مشمش مجفف
• 1/2 كوب سكر
• 3 أكواب مية
• مكعبات ثلج "اختياري"

الطريقة:-

انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كأسات العصير وضيفي إليه مكعبات الثلج.

طبق الشوربة 
شوربة الخضار بالشعرية
المقادير:-

• 1/4 كيلو بسلة
• 1/4 كيلو فاصوليا خضراء
• 2 حبة جزر مقطعة مكعبات متوسطة الحجم
• 2حبة بطاطس مقطعة مكعبات متوسطة الحجم
• 2 حبة كوسا مقطعة مكعبات متوسطة الحجم
• 1/2 كوب شعرية
• معلقتين سمنة
• معلقة ملح وفلفل
• شوربة فراخ أو لحمة
• مكعب مرقة دجاج "اختياري"
• حزمة بقدونس مقطعة قطع صغيرة "للتجميل"
• عصير ليمونة "اختياري"

الطريقة:-

1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.

2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.

3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.

طبق الحلو 
كنافة بالمكسرات
المقادير:-

• 1/ 2 كيلو كنافة
• 1/ 4 كوباية زيت ذرة
• 1/ 2 كوباية زبدة أو سمنة
• 1/ 4 كوباية عين جمل أو جوز من غير قشرة
• 1/ 4 لوز من غير قشرة
• 1/ 4 كوباية بندق من غير قشرة
• 1/ 4 كوباية فستق من غير قشرة
• 1/ 2 كوباية زبيب

مقادير الشربات:

• 1/ 2 كوباية سكر
• 3/ 4 كوباية مية
• عصير ليمون
• فانيليا.

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.

طريقة عمل الكنافة:-

1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.

2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها. 

3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.

5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.

يسلمو رومبا ردك

وانا شايفه انها دي طرق

بسيطه واي حد ممكن يجربها

عاوزين العيال يجيبو اكل 

ولا باين عليهم مش بيعرفو يطبخو