المكالمه القاتله

من طرف أروى السبت أغسطس 07, 2010 10:46 pm

فى يوم من ذات الأيام , يفكر شون فى الحديث الى صديقه و رفيق كفاحه تريبل اتش

شون : صباح الخير
اتش : صباح الفل
شون : احممم...دستور , ممكن أكلم السيد المحترم تريبل اتش
اتش : ما هو أنا ياض , مش عارف صوتى و لا ايه
شون : معلش قلت يمكن ستيفانى ولا حد من الولاد ميصحش برضه
اتش : وله ...
شون: خلاص , خلاص , مش طالبه pedigree فى التليفون
اتش : الطيب أحسن , أنا برضه , مش عايز sweet chin music
شون : أنا بس قلت أكلمك أطمئن عليك عشان بقالك مدة مختفى
اتش : أنت عارف بقى ستيفانى على وش ولادة و لازم آخد بالى من البيت و الأولاد
شون : بس أنا سمعت أنك بتعمل فيلم و هتبقى نجم سينمائى
اتش : اشاعات , دى ستيفانى كانت تقتلنى....أنت عارف بقى سينما و معجبات...
شون : و يا ترى بقى بتساعدها فعلا ؟
اتش : والله يا اخويا مش عاجبها حاجة خالص
شون : ازاى ؟
اتش : ديك النهار , دخلت المطبخ لقيت محشى على الترايبزة , روحت مقوره عشان أحشيه
شون : جميل
اتش : لأ , جت لبستنى الحلة , وقالت لى حرام عليك فكيت المحشى بعد ما حشيته
شون : استنى , استنى , هو كان لونه ايه ؟
اتش : أخضر
شون : يا نهار ؟ ده محشى ورق عنب كانت هى حاشياه خلاص و أنت روحت قورته و فضيت الأرز منه !!!!!!!!!!
ورق العنب الأخضر ده ورق بتلفه حوالين الأرز يا أستاذ و لازم تلفه كويس و يكون رفيع و ألا يفك فى الحلة و بيتاكل جنبه...
اتش : أنت هتعمل فيها شيف ؟ طب شوف اللى حصل تانى يوم
شون : معاك
اتش : روحت لقيت المشى متقور جاهز و مفهوش رز
شون : جميل
اتش : روحت قاطعه من الجنب عشان يبقى ورقة و حطيت الأرز جواه و لفيته...بس مش عارف ليه كان ورق تخين المرة دى لفه صعب قوى
شون : و طبعا كان لونه أبيض
اتش : عرفت منين ؟ هى أشتكت لك ؟
شون : من غير ما تشتكى , ما ولادك عاملين دوشة فى الكفر طول النهار...
اتش : ده كده قلبت على حاجة تانية
شون : قصدى , ده محشى بتنجان أبيض , هو ده بقى اللى بيتقور و يتحشى زى ما عملت فى الأول فى ورق العنب
اتش : قصره , دى كانت نهايتى فى عالم المطبخ
شون : يا عم آهو كلهم كده المفروض كانت تشكرك على مساعدتك بصرف النظر عن النتيجة , طب انت شوف اللى حصل معايا
اتش : فضفض
شون : ديك النهار..
اتش : دى نفس حكايتى
شون : طيب , ديك النهار
اتش : أيوه كده
شون : دار الحديث التالى :

ربيكا : أنت نازل الشغل امتى ؟
شون : ايه يا وليه جرالك ايه , أنا مش اعتزلت ؟
ربيكا : يعنى هتفضل قاعدلى كده ؟ طب أقله ساعدنى
شون : طب ادينى حاجة للمبتدئين...ايه الدموع دى اللى فى عنيكى , صعبت عليكى ؟
ربيكا : لأ , دى دموع الفرح...قصدى البصل
شون : طب هاتى و أنا اكمل...
ربيكا : طب خذ دول قشرهم الأول أشوف شطارتك الأول , أحشن واحدة صاحبتى بتحكيلى أن جوزها بيقور ورق العنب و يلف البتنجان الأبيض
شون : ها ها ها ده عبيط ده و لا أيه

اتش : اتلم ياض
شون : مكنتش أعرف , سيبنى أكمل...المهم فضلت كل ما أقشر قشرة ألاقى قشرة تانية و هكذا لغاية ما البصل كله خلص و ما لقيتش غير قشر , روحت راميه فى الزبالة , و طبعا كان يوم...
اتش : يا بنى , هى القشرة الخارجية بس اللى بتتشال , الباقى ده البصل نفسه طبقات كده بيضاء مش قشر
شون : طب و ساكت ليه ما كنت تقوللى على البصل و أنا أقولك على المحشى , نتبادل الخبرات يعنى , ده الأصحاب لبعض يا جدع
اتش : على ايه يا عم , دول ما يستاهلوش , كده أريح قاعدين سلاطين
شون : أيوه , عندك حق
اتش : ايه ده النور قطع
شون : و أنا كمان
اتش : ربنا يجعل كلامنا خفيف عليهم...ايه ده النور جه
شون : و أنا كمان .. بس ..بس
اتش : واقف قدامى أندرتيكر
شون : و أنا كمان
اتش : أنت هتصيع عليا يا يلا ؟ ازاى يعنى ؟ واسعة دى شوية
شون : صدقنى ... بس هو تيكر اللى عندك شعره لونه ايه ؟
اتش : يا مصبرنى....أسود.. لون الليلة الهباب دى اللى رديت على التليفون و كلمتك فيها
شون : أصل اللى عندى شعره لونه أصفر...تفتكر ليه ؟
اتش : باين تيكر اللى عندى اسمه ستيفانى
شون : و انا كما...قصدى اللى عندى اسمه ربيكا...استر من المهالك يا رب
اتش : و أنا كمان
شون : جزمة ... من أول الموضوع و نفسك تقولها

و يأخذ كلا منهما شوك سلام معتبر و لا تيكر فى زمانه عملها...ايه ده .. اي ده

يا رب يعجبكم التوبيك